பயணமாகும் மனசு

ஒரு வயதுக்கு வந்த பகலை

குமரச் சூரியன் பார்க்க வந்த

வைகறை நேரம்,

மிச்சத்தூக்கத்தை ரயிலில் தூங்கலாமெனச் சென்று

தூங்காதவொரு நாள்

தண்டவாளத்துக்கு நெருக்கமாய்

அடுக்கக வீட்டுப் பின்புறம்

மேய்ந்து திரியும் கோழி

குழி பறித்துத் தூங்குகிற நாய்

அழுகியதால் தூக்கியெறியப்பட்ட இடத்தில்

புது ஜீவனோடு சில தக்காளிச் செடி

ஒன்றிரண்டு மங்கன்று

கூட்டமாய் பப்பாளிச் செடி

முளைத்திருந்ததின் அருகில்

ஒரிரு தினங்களுக்கு முன்

எறியப்பட்ட கண்ணாடி

தனக்குள் ஆழப்பதிந்த முகங்களோடு

தனக்குள் ஆழப்பதியாத சில முகங்களையும்

சேர்த்துக் காட்டியது

பயணமாகும் உடைந்த மனசுகளுக்கு

ஆறுதலாய் தினமும்.